Раководителот на Основното државно обвинителство во Рожаје, Алдин Калач, потврди дека мајката на 25-годишниот Вехид Муриќ ја повикала полицијата откако нејзиниот син ѝ признал дека извршил тешко кривично дело.
Според Калач, осомничениот синоќа дошол во семејниот дом во Рожаје и ѝ рекол на мајка си дека „ги окрвавил рацете“, по што веднаш ја напуштил куќата. Мајката веднаш го пријавила случајот во полиција.
Тој демантираше и дел од медиумските наводи дека Муриќ претходно бил пријавуван за семејно насилство, посочувајќи дека такви информации не се точни.
Во меѓувреме, во Подгорица се пронајдени телата на три полнолетни машки лица, за чие убиство се сомничи токму Муриќ. Од полицијата информираат дека по него се трага интензивно и дека сите расположливи ресурси се ставени во функција за негово пронаоѓање и приведување.
Полицијата апелира до граѓаните, доколку имаат какви било информации за неговото движење, да ги пријават во најблиската полициска станица или на телефонскиот број 122, а воедно предупредува да се биде внимателен доколку некој дојде во контакт со осомничениот.
Според првичните информации, се сомнева дека убиствата се извршени во текот на ноќта во изнајмен стан, каде Муриќ престојувал заедно со жртвите, со кои работел на градежни активности. Меѓу убиените се браќата Денис Хот и Незрин Хот, како и уште едно лице. Се претпоставува дека убиствата се извршени со ладно оружје.