Германските компании сè повеќе отворено се обидуваат да го намалат бројот на постари и поскапи вработени, а овој процес веќе ги чини огромни суми пари. Според податоците објавени од Ханделсблат, само во првите девет месеци од оваа година, компаниите од индексот DAX потрошиле околу шест милијарди евра за реструктуирање.
Овие расходи директно ја намалуваат нето добивката на големите корпорации, бидејќи поголемиот дел од трошоците одат во програми за предвремено пензионирање и пакети за високи отпремнини, кои често достигнуваат шестцифрена бројка.
Странските работници во Германија, вклучително и граѓаните на Македонија, исто така имаат право на овие програми, под услов да се во директен работен однос со компанијата и да ги исполнуваат критериумите поврзани со возраста и должината на работниот стаж.
Програмите за излез од компаниите станаа исклучително поволни за вработените, вклучувајќи предвремени пензионирања, значителна отпремнина и модели на работа со скратено работно време кои дополнително се субвенционираат од компаниите.
Примери:
За 50-годишен менаџер кој заработува околу 9.000 евра месечно и има повеќе од 20 години стаж, отпремнината може да надмине 400.000 евра.
Вработените со пониски приходи и 10 години стаж можат да сметаат на околу 47.000 евра, а со 20 години стаж, до 100.000 евра.
Овие правила важат подеднакво и за странските работници, вклучително и за Македонци, бидејќи отпремнината се пресметува според единствени критериуми.
Компаниите планираат големи заштеди токму преку намалување на бројот на вработени, а на десетици илјади работници им е дадена можност да заминат преку доброволни програми.